पौष २२ । ‘कर्मयोगी बद्री पहाडी समाजसेवा पुरस्कार’–२०७६ पूर्वप्रमुख निर्वाचन आयुक्त भोजराज पोखरेललाई प्रदान गरिएको छ ।
बुधबार राजधानीमा आयोजित कार्यक्रममा पोखरेललाई एक लाख १० हजार रुपैयाँ पुरस्कार राशिसहित सम्मान गरिएको हो ।
मानव अधिकार तथा शान्ति समाजका संस्थापक सभापति कृष्ण पहाडीले पोखरेललाई सो पुरस्कार प्रदान गरे । यो समाजद्वारा स्थापित पुरस्कार हो ।
यसैगरी, आठओटा सामाजिक संस्थाहरुले पनि सोही कार्यक्रममा पोखरेललाई सम्मान गरेका थिए ।
पुरस्कृत पोखरेलले हरेक क्षेत्रको अति राजनीतिकरण, प्रजातन्त्रको खम्बाका रुपमा रहेका संस्थाहरुको अति क्षयीकरण तथा तेजोबध हुनु मुलुकको अवनतिको कारण रहेको भन्दै अहिले अन्तराष्ट्रियस्तरमा नेपालको साख गिरेको बताए ।
कार्यक्रममा पोखरेलले कल्याणकारी कार्यमा समर्पित सेवामुखी संस्था लक्ष्मी प्रतिष्ठानलाई आफ्ना तर्फबाट दुई लाख २० हजार रुपैयाँ नगद सहयोग हस्तान्तरण गरेका थिए ।