पौष २२ । बाँकेको खजुरा गाउँपालिका–४ का तिलक सिरिसमगरले ड्रागन फ्रुटका १० ओटा बोटबाट वार्षिक करिब ५० हजार रुपैयाँसम्म आम्दानी गर्न सफल भएका छन् ।
छ वर्ष वैदेशिक रोजगारमा ड्रागन खेती गरेर घर फर्किएका मगरले मलेसियाबाट एउटा बोट ल्याएर आफ्नै बारीमा यसको खेती गरेका हुन् ।
मगर छ वर्षसम्म वैदेशिक रोजगारीका लागि मलेसिया बसे । त्यहाँ ड्रागन फ्रुटको फार्ममा काम गरे । अहिले भने आफ्नै ठाउँमा ड्रागन फ्रुटको खेतीमा लागेका छन् ।
एउटा बोटबाट खेती सुरु गरेका मगरको बारीमा अहिले ११० ओटा पिलरमा ४४० ओटा बिरुवा रहेका छन् । १० ओटा बोटले आम्दानी दिन थालिसकेको छ ।
गत वर्ष १० ओटा बोटबाट ४० हजार रुपैयाँ आम्दानी भएको र यस वर्ष अहिलेसम्म ३० हजार रुपैयाँ बढीको बिक्री भइसकेको उनले बताए ।
ड्रागन खेतीमा मगरकी बहिनी कविता थापाले सघाउँदै आएकी छन् । ड्रागन फ्रुटको बजारको समस्या नरहेको थापाले बताइन् । अहिलेसम्म घरबाटै प्रतिकेजी ६०० रुपैयाँको दरले बिक्री भइराखेको छ । अहिले सेतो र पिङ्क गरी दुई किसिमका ड्रागनका बिरुवा लगाएको पनि थापाले बताइन् ।
स्वास्थ्यको लागि लाभदायक भएकोले गाउँपालिकाले ड्रागन खेतीलाई प्रोत्सहन गर्ने भएको छ । पालिकाले आर्थिक, प्राविधिकरुपले सहयोग गरी किसानहरुलाई ड्रागन फ्रुट खेतीमा प्रोत्साहन गर्न लागेको गाउँपालिकाका कृषि शाखा प्राविधिक अंकित विश्वकर्माले बताए ।
पालिकालाई नामुना गाउँपालिका बनाउने योजना भएकाले पनि कृषितर्फ ड्रागन फ्रुटलाई प्राथमिकता दिएर अगाडि बढ्ने योजना गाउँपालिकाले बनाएको छ ।
